DOPO vere catà i du operai dela forestale, indafarà a far finta de fare gnente, la menoaja ciapa la via del bosco, stavolta sperando che almanco le indicazion d'i du esperti del luogo le servisse par no perdarse. 'Ndare drento e fora dal bosco, so sentieri pieni de foje o de polvare opure de sassi, ora in salita e ora in dissesa, al sole o al'onbra: na festa che ga durà almanco

mez'ora. Fin che no s'a presentà el primo incrocio, che no'l ghea da essarghe secondo el disegno d'i du vedeluni. Che fa anca rima... Quatro vie, quatro pensieri, ma na decision sola: se va a destra. Anca se par là ghe jera on saliton, che però el ciamava. Dopo de quelo 'nantro toco de bosco, fin a catare, so 'nantro incrocio che no ghea da essarghe, on cantiere de tajalegna drio derfare el bosco. Par de là va ben, risponde el pì cordiale. On stradon co on strato de polvare fina come el talco, co legna fata su dale parte, el parea menare par la parte justa. Infati. Dopo 'nantro jaron in salita da colpo, el sterato, ormai deventà largo come na provinciale, xe sbucà sola sfalto. La scrita "Ristorante del Gatto d'Oro" - sola strada par l'Amiata - ga stabilio che quela la jera la strada justa.

 

Co la facia pì tosta de sto mondo,

du "guardia forestale", uno tondo

e staltro on fiantin pì mendicheto,

tuti du vestìi co 'n bel jubeto,

i jera sola strada, ciacolando

de gnente, forse, come a spetando

che sonesse prima o dopo el mezodì

cussì da ciapar su, e 'ndar via da lì.

I ga risposto, vero, volentiera

a la domanda, fata in bela ziera:

" sta strada che va suso par la destra,

pendente che me sa chi'a ne menestra,

pòrtela, par caso, al gato d'oro?"

" sihuro he la porta 'n sul pianoro,

la va proprio di lì, un c'è he dire,

ma l'è di molto dura risalire:

l'è meglio assai, perciò, hari signori

he vu 'un vi cercaste sti sudori ".

Laorare no i ghea oja, e se vedea,

ma ch'i du menarosti se credea

de ver da fare co d'i pelegrini

e no co na sgnarà de gardelini.

Grazie, ghe dise tuti sete in coro

pensando "che ve vegna el samoro!"

e fato questo i monta sol fero,

senza paura e senza on pensiero,

ciapando su pa'l bosco, senpre belo

sicuri de capirse assè co quelo.

LA guida leta la sera prima (e persa ) metea in guardia so la dissesa del gato d'oro: teribile! Tremendeta la jera, però... On troduoleto streto, pien de sassi, messo a quarantazinque gradi, curve seche e, dopo na zinquantena de metri, rame de tute le misure tajà e assà par tera da tajalegna malguaji par conplicarghe la vita ai nostri baldi jovanoti. In tuto, on spetacolo. Bravi i sete cavalieri dela pocalisse a schivare on sasso, montare so na rama, sbrissare so on palo, rimontare so nantro sasso e 'ndare de traverso par la pendenza e la tera che no tegnea la frenada. El grupo s'a sgranà, col solito Renzo partio de fuga e col solito Tomaso (v. quadreto rosso sola fotografia)che se ferma a pissare anca in dissesa. Dopo sta goduria, la trajedia. Introdà so on sentiero segnalà, la trupa s'à catà de colpo a decidare se perdarse 'ndando su o 'ndando zo; in tuti du i casi el trodo jera bruto e poco pestà. Ma ghe jera oncora el segnaleto bianco-rosso! E alora, via, in salita. Trexento metri, po' basta. Hansel e Gretel davanti e tuti staltri de drio col sentiero - senpre segnà - che no ghe jera pì. Luigino in panico, Tiziano che parlava a sproposito, Tomaso e Claudio, mah.