Pena ciapà 'l sterato che porta su,

on saliton che se fa dare del vu,

el mondo ga scoperto che Luigino

anca se intasà, el "poverino",

el jera in grado de pentare in suso

come se'l supiesse gas for' dal ...buso.

Fin chì gnente de male: 'l fato jera

che po' l'è 'nda cussì fin ala sera!

Alora el judizio d'i conpagni

xe sta che, forse, elo i so guadagni

va che 'l li spende tuti in pastigliuni,

o erbe da fumo che tuti i marajuni

che fa del sport 'na volta a setimana

i manda zo come si'a fusse mana.

Co tuto questo, se ti te ghi'o disi

elo risponde: "no ronpare i bisi",

cussita a tuti quanti no ghe resta

de 'ndarghe 'rente e, co 'n pugno in testa,

fare in maniera che'l toso rajona

e, se ocore, mandarlo in mona!

INTANTO , co tuto sto zercare, nissuni s'ea incorto che el novizo, Tiziano, no'l ghea pì dito gnente dopo la visita ala pro-loco. El jera inmusonà, par protesta. Ma el Mestro, esperto de robe del'altro mondo, visto el pìpio del toso el ghe se ga avicinà e, fàndoghe na careza, el ga dito al'incirca cussì: " Sti quatro sbuderati senza cuore i t'a dito su par via che te ghe cagà fora dal bocale che guai a ti se ti'o fè oncora ma xe mejo farlo che no farlo che cussì te te dimostri omo e par essare omo te ghe da stare al zuogo che anca s'i te tole pa'l culo ti ridi che staltri ride on pasto instesso basta che no te esajeri gheto capio?". Capio, siorsì. E 'l ga tacà a esajerare.

LA jornata la jera za on toco vanti e i sete capitali i jera oncora in zerca de sentieri, za che'l Mestro ghea perso la cartina-guida. Xe sta solo parché Tomaso ga volesto fermarse ala terza stazion dela viacrùci (so na jornata el pissa quindese, sedese volte) che la vedeta s'a incorto che sola sinistra ghe jera on cartelo mezo sconto dale foje e, par tera, trenta zentimetri de vargo che se butava de rugolon sol bosco. El cartelo disea de 'ndare par lì. E cussì xe sta, verso la Fonte delle Monache. Belo assè, tènico, veloce, el sentiereto: curto, però. De cao, on spiazo e quelo che dovaria essare na fontanela, ma che spissolava come el ciceto de on neonato. Poca aqua e gnan na munega.

LA facenda dele "performances" del rajoniere jenerale del grupo no ga servio par farghe fare manco fadiga a staltri cavalieri che, a ogni modo, i ga podesto scalare el sentiero cancaro e rivare al Podere Cipriana, za visto de sfriso el dì prima. On bel'esenpio de recupero intelijente del teritorio e del ricordo de na tradizion ormai abandonà: quela de curare el bosco standoghe drento, no rivandoghe da fora co ruspe, camio, seghe a motore e altre trapole moderne. Dala Cipriana xe sta on supio sbucare fora dal sentiero par traversare la sfalto. El problema xe sta catare l'incrocio! Sola carta ghe jera, pena fora dal sentiero, 'nantro rudere - l'ex Podere Pozzaroni - po' on toco de sfalto e, so na curva seca a destra, 'nantra sfalto par deviare a sinistra. Sola carta... La curva seca a destra la ghe jera, ala distanza calcolà dal navigatore satelitare del drapelo, ma sola sinistra  ghe jera on spiazo co d'i albari tajà e on sterato pien de sassi che se butava in dissesa. Né pì in qua né pì in'a ghe jera sfalto: almanco cussì ga riferìo el segujo dipromà rajoniere mandà in perlustrazion. Tomaso volea ciamare la protezion civile, Giuliano "Chi la visto" e Renzo "Strissia la notizia" par dirghe che jera sparia na strada. Xe sta mejo par tuti continuare via sfalto, in zerca de 'na soluzion mejo.

La strada sparìa