SOLA strada par la zima, a se ghemo desmentegà de dire che la trupa s'à introdà so on sentiero che jera na goduria: justo quel che ghe volea dopo che tuti jera restà a boca veRta a vedare come che Claudio, che forse el ghea magnà calche pastiglion, el ghea fato su na salita inpossibole. Sto sentiero el xe doparà de in-verno come pista de sci da fondo e 'l se presenta come on su e zo continuo, come dele gobe da ca-melo. Che po' el xe el nome del sentiero stesso. Da sbalo, co i zighi de tuti che rinbonbava in mezo al bosco, paraltro senpre invaso da on silenzio relijoso. Dito questo, che bisognava, tornemo al viajo in direta. 'Ndare zo dala veta el xe sta on supion fin al rifujo basso, dove s'à dovesto de studiare le carte. E dove che Tomaso, forse in vena de suicidio doloso, el s'à inbalzà so on tapeto solevando do tole de on tonbin e fasendo on casin tale che dala baita xe vegnù fora la parona che, co l'aria preocupà, la lo ga mandà in malora. Tomaso gà minacià de 'ndare dal'avocato. Da lì i ga inforcà on trato in  zo fin a butarse in mezo a dele baite sconte sol bosco de fajo, ala cacia

de on sentiero-no sentiero che dovea essarghe lì da calche parte.

Solo el fiuto de Tiziano ga portà el grupo sola tracia, sconta da on leto de foje seche che le parea ridare al passajo dele roe preocupà dela bici de Luigino. Vinti minuti de su e zo, scunti so on bosco che ghe manca solo la parola, on fià in ansia parché la direzion no jera sicura. Tuto xe sta pì fazile quando che s'à presentà on sentiero vero che, co du salti in salita, l'è sbucà so la sfalto. Lì, la crisi, anzi el crolo de Tiziano, inmortalà par le jenerazion future da on fotografo de passajo  e incolà so sta pajina de storia. Chi xe che gavaria pensà che on toso sol fiore dela gioventù podesse ridurse a tanto. Se ghe fusse sta Oscar el gavaria parlà de fine iminente. Na spuza de vuovi marzi, drio la dis-sesa sfaltà che portava al paese, ga fato fermare la garavana so on spiazo dove che dovea essarghe na vecia fonte de aqua marza. La jera seca, la fonte, ma la spuza la inpenia i palmuni. Co la scusa che l'Amiata na volta el jera on vulcano, sta spuza la vien diretamente da soto, forse proprio dal'inferno...Curta la visita e veloce el rientro a l'albergo K2, co la fame che fasea 90.

Sto giro nol' xe sta senza difeti:

xe come se manchesse d'i confeti

a on sposalizio. La cronaca la gà

messo a tasere quel che xe capità

pa' almanco na mezora 'ncora prima 

che'l grupo sderenà rivesse in zima.

A ghe xe sta on'azion del nostro Claudio

che qua la vol contà, parché l'è on gaudio:

S'à presentà on passajo, fora sfalto,

de quili che in tri metri porta in alto,

on trato de sentiero polvaroso

pendente, bruto assè e cancaroso.

Ma 'l nostro atreta, cargo de corajo,

vardandolo 'ntel muso el gà dà l'ajo

e co tre spedalà, come na sita,

el xe rivà dessora la salita.

Po' staltri, bici in spala, col pensiero

i ga seguio l'eroe so chel sentiero

sentiendose sol cuore l'amirazion,

ma anca on cincinin de umiliazion.

Pì vanti, vedarì lezendo in parte,

el protonzin ga tirà fora l'arte

par scavalcare e par farghe el pelo

a on luogo fato a gobe de camelo.

Senza parole...