El viajo so l'asfalto no ga storia

e no'l ne dà rason de far baldoria,

però 'l trasferimeto par la veta...

l'è fato de salita maledeta.

Vien nominà sta roba par on fato

teribile, malguajo e sbuderato

de quili che sucede ogni tanto

e restarà inamente chissà quanto.

On omo, che sia on omo, no fa stato

- par quanto che'l sia perfido o mato -

so la so' forza in gropa ala bici

par fare 'ndare i amighi sui pastici.

La storia podì lezarla chì in parte

(parché a contarla in rima ghe vol arte),

però bisogna ben che sta colona

a vegna che la diga e la mezona.

Vargogna, sior Tiziano, sì, vargogna:

inpara, e 'desso gratate sta rogna,

che se te si rivà par primo in veta

domando la salita maledeta,

no te ghe meriti speciali: gnente!

Te sì on cagafati, insolente,

senza rispeto par chì du vecioti

chi xe rivà pian pian, ma no stracoti.

Stracoto (varda la fotografia)

te jeri, inveze, ti: in agonia,

chel tanto che 'pena che te si rivà

i t'à ritrato in doe e sderenà.

 

LA FOTOGRAFIA PARLA CIARO!

A ogni modo, tuti sani e salvi: questa jera la meta. Restava solo da ranpegarse su par na sassara ben messa, in pendenza da no fare, par rivare sol cocuzolo, dove che ghe jera na specie de tore Eifel che inveze de finire in alto co on ristorante la finisse co na crose. Da on cao ghe iera on pojoleto co na vista da restare senza fià sola val D'Orcia, co tute le so colinete arà e tirà a spago, spanpanà de boarie sui cocuzoli guarnii de cipressi alti e striti. Da scaltro cao na serie de boteghete del cavolo, tipo San-Marino, che vendea ciciuatoli, ma anca del bon cafè. Bevù e gustà! So una, on camin co dele bronze che, volendo, le gavaria cusinà dele costine de cinghiale. Roba proibia dal'antidòpinghe. E alora no restava che 'ndare zo par la sassara. Zo!

SO on giro come questo sucede senpre de tuto e ormai no se se maraveja squasi pì de gnente. Squasi! Donca, vedemo de riciaparse col filo del discorso: na volta fora dal bosco, la gioventù s'à catà da fare on fia de su e zo so on toco de sfalto, senza storia, se no fusse parché i sete jaonzei ga dovesto vestirse par via del garbinelo del luogo. Tuto xe scumizià pì vanti, co xe sta ora de darghe batalia ala salita - torno ai quatro chilometri - che da l'ultimo rifujo portava su sola veta del monte.  S'a fato vanti Tiziano, Luigino e el Mestro, tuti tri in vena de numari, e po' drio staltri. Col frescheto la garavana - divisa in do - xe rivà sol piazale dela veta senza suare tanto, ma pantezando assè, parché la salita la jera sol pendente andante. Xe sta na volta rivà in zima l'avanguardia che xe sucesso el patatrac. La vignola del grupo, Tiziano, pena rivà ga tirà fora l'orolojo da corsa, el ga vardà l'ora, el ga fato partire el cronometro e po' -spavaldo insolente - el  s'à messo in atesa disendo: "Mestro, desso vedemo quanto ca ghemo da a staltri". No'l lo ghesse mai fato:

el Mestro, difensore d'i deboli e d'i opressi,el ghe xe saltà su al biastemadore e, fasendolo vargognare int'el muso de stare al mondo, el ga spiegà che no se va vanti par vinzare, ma par fare strada; che no se core pì forte par umiliare i debole, ma par preparare el tereno; che no se riva primi par cantare vitoria, ma par tegnerse prunti a rancurare i ultimi e che no se core pì forte par farse bei. E via discorendo. No se sa se'l gabia capìo la tìnfana, parché fin che'l Mestro predicava elo s'ea destirà so na panchina e, derfato dala fadiga, el s'ea messo a ronfare ala grande. Che joventù che ghe xe oncuò...