DOPO el rifujo forestale ghe jera el sentiero, sospirà el dì prima e oncuò catà fora. Xe sta fazile inbocarlo, manco continuare a pedalare. Dopo i primi du strapiti - el jera on bel salissendi ora streto  e ora pì largo - sete stomeghi ga tacà a protestare. El panin e la bireta fornii dala casa i jera oncora lì ch'i 'ndasea basso e a ogni sforzo i se presentava oncora al'entrata. "Tusi, bisogna fermarsi vinti minuti, senò butemo fora l'anema", ga amonio el Dr. Rag. Luigino. El Mestro jera za deventà verde e Tomaso bianco; co Renzo rosso in tri i fasea na bandiera taliana. On bel spiazo inbusà sol bosco ga oferto riposo ai viandanti. Che, inveze de sentarse, i s'à catà on laoro par mazare el tenpo. Na rama de fajo, alta, ga ispirà Claudio che, in vena agonistica, ga proposto de tirare on legno par centrare la rama. Par la desperazion de Tiziano, incazà co tuti - parché ga provà tuti fora che elo - vedendo tuti assarse ciapare da sto zugheto. " 'Nantra volta, el dise, vago in gita a Gàrdalan". Manco male!

 

On fato xe sicuro, sta stimana:

che chi ne n'à jutà, porca putana,

no la xe sta la cartina in dotazion,

ma la fortuna e la desperazion.

Ogni zento metri, a ben vardare,

el Mestro jera in bruso de sbaliare;

e alora lì, ucialiti sol naso,

co intorno Renzo, atento e Tomaso

e po' Luigino, e Claudio e Giuliano

e, senpre in mezo, el prode Tiziano;

so na man la bussola, e la carta

so staltra, parché el convolio riparta.

La xe sta na struma, na fadigaza

par tuti. Ma sta jente xe na raza

che no ghe n'è una de dificoltà

che prima o dopo no la vegna domà.

Come xe che podea 'ndare a finire

on viajo che, za prima de partire,

se saea chel ghea da fare co 'n Monte

grande assè e co mile strade sconte?

Eco: l'ultimo toco de sentiero,

ben segnà, bianco e rosso (culatiero!),

el ga portà la trupa fora strada.

 La zareseta so sta torta de casada.

LE sorprese no le jera gnancora finie. Finia la dijestion tuti in sela drio a chel sentiero spetacolare. Streto, largo, sassi, lissio, raise, buse, foje, rame, scuro, sole, fajo, castagno. Fin a on incrocio che el cartografo ga riconossio, anca se la cartina ormai no la servia gnanca pì par strodare ...gnente. El convolio jera drio passare poco distante dal luogo del rumegoto de Renzo, ormai ristabilio dala tugà sole costignole. Alora, par no fare la terza volta la stessa dissesa, bisognava 'ndare par staltro cao del'incrocio. Claudio, in avanscoperta, el cata on passajo, segnà bianco e rosso. Da lì tuto on sterato ben batù e largo, senpre in dissesa, senpre segnà bianco e rosso, sempre so on bosco spetacolare. E alora, dove xili i problemi. No se saea gnancora. Ma, dito in rima chì in parte, ocore dirlo oncora. Come ultimo ato de cativeria, el Monte Amiata ga volesto darghe on saludo stranbo ai so visitatori. Fora dal bosco, fora dal sterato, cossa xe e cossa no xe, el Mestro vede on panorama che no ghea da essarghe. Come se la coriera Padova-Stanghela la te desmontesse a Bassan: fora strada. Colpa del'autista? No, colpa de chel cancaro de tipografo che ga stanpà la cartina! A ogni modo, sola destra se vedea ben in lontananza Abbadia. Da lì la jera dissesa veloce fin al K2. Ultima dissesa del'ano. Fata come na sita da Tiziano, ai setanta l'ora in dupia fila co Màicol Xiomàche. Ma la ghe xe costà tri punti..