La prima roba che te salta al'ocio

rivando là par destrigare el pocio,

el xe el verde de sta gran montagna,

fata de fajo, pin e de castagna;

el Monte Amiata el xe quel che resta

de on vulcano de l'età rubesta

de quando el mondo jera tuto 'n fuogo

e la fumara jera in ogni luogo.

Sto bel colore sluse so la vale

dove che l'Orcia par che'l zoga a bale

co le coline, che la man de l'omo

la tira a spago, lustre cofà on pomo.

I sete, duri quando ch'i xe in sela,

davanti a questo vien ch'i se scapela

e col pensiero, 'fà na mente sola,

i dise: "Oscar, no ghe xe parola!".

L'albergo che la comission ga sielto,

vizin la  piaza, se ghe riva sguelto

par na salita de piere ben messe

che la se rànpega come si'a ghesse

da fare zento metri de livelo

so na distanza longa come quelo.

Vista, 'l pensiero core sùito a quando,

dopo on dì de lengua fora, rivando

te cati sto po-po de sacramento

che farlo te 'ndarè in svanimento.

Ma i sete vagabundi del pedale

tacà sol posto justo i ga di'e bale

cofà 'n toro, come quili da corida:

on saliton cussita 'l xe na sfida.

ZUGATANDO co le parole, vien da incòrzarse che se parla de patentini,senza che nissuni gabia spiegà de cossa che se trata. Ben, eco la spiegazion. Sicome che ultimamente, a ogni giro del venare sui nostri colli, Tiziano el ghea ciapà el ciucio a forare vinti volte, a farse catare co dele camardarie da Ruanda Burundi, co le peze de legno tacà co la cola garavela, e - pezo oncora - a forare pena partio, da Pessati se ghea deciso che bisognava darghe on tajo. E fare come i carbunieri: la patente a punti, che se te vè forte i te cava du punti, se no te ghe la zintura i te ne cava tri, se te incantuni la morosa fin che te guidi i te cava le balote, e via cussì. Dito e fato. La stanparìa crandestina ga fato na copia dela patente a tuti co vinti punti notà par tuti; la consulenza legale, fata da na comission conposta da Maurizio Pegoraro, ga detà le regole;  el colejo judicante senza apelo conposto dal Mestro e da Renzo, adeti a cavare i punti come al'ospedale; e la corte che si riunirà ogni sera dopo zena in tibunale al'albergo K2 par judicare fati, misfati e difati cussì  xe sta fato. Le Sentenze xe pubricà in ultima pajina, ala fine dele memorie de sto viajo. Robe da galera...

AL VIA, la matina del primo dì, ghe jera tuti ...quili che jera partii da Suisin se intende. Quili che ghea dà forfè no i ghe jera. Pezo par ili. La matinata jera fresca che bastava, el sole prometea ben e Tiziano ghea za scumiazià a preocupare. El s'a presentà al raduno al garaje vestio in spadina, come el dì dela sagra de Suisin, co on zaineto che no ghe stasea gnanca on spazolin da denti e de sicurosenza la velanprina a vento, senza na jachetina pa'l fredo, senza on par de braghete longhe che in montagna no se sa mai. On disastro, causà da la mancanza de esperienza e anca dala disobedienza: infati, el dì prima el Mestro lo ghea avisà de fornirse del'ocorente bisogno, ma elo, gnente. E questo xe sta el primo disguido, roba da patentin. El secondo sinistro ghe xe capità a Claudio che, desmentegandose de far vedare el cavalo dal maniscalco par vedare se'l ghea tuti i feri aposto, chi'a matina el ga catà na roa in tera: co tuto el narvosoche fa vegnere ste robe ai atreti, za tirà par conto soo. Roba da patentin. Terzo malan, anca questo grave vista l'età e l'esperienza del'omo: Luigino, tentando de far finta de gnente, el ga dovesto confessare de vere assà casa el zaino. Par no fare bruta figura el ghea za pronto on piano: la jacheta, rodolà, so na scarsela; le braghe, rodolà, so nantra; el capauèi, strafugnà so la terza scarsela; el persego el lo gavaria magnà sùito e la banana... e la banana? On buso par la banana se cata senpre! I lo ga sgamà che'l jera drio calare le mutande par catarghe on buso ala banana. Roba da patentin, tri punti.