al fornaro; e po' el ga na crosta dura che inveze del'aqua, par inpastarlo, i ga da metarghe el vinavil. A ogni modo la mortadela jera bona e tuti ga fato onore. La bira, inveze, la jera calda, colpa de nissuni. Uno a uno i  sete pelegrini xe finìi par sentarse sol cadavaro del pin de trenta metri, intortà dala fadiga e co on gropo sol stomego dove che s'ea calà el pan, la mortadela, la ueta del Mestro, na marmelatina robà al K2, on pomo e na banana. Che sol pantazo del rajoniere jenerale s'à zontà a tuta la roba ingiutia dala domenega. Par la sicureza de tuti sarìa sta mejo che da lì chel pericolo el ghesse da 'ndare vanti da elo solo.

 

Man man che, spedalando so chel posto

decisi de 'ndar vanti a ogni costo,

se avicinava l'ora dela supa,

el solito caìa dela trupa

el tontonava come na comare

che "...desso a xe ora de magnare".

No'l s'ea desmentegà la mortadela

cronpà da chià sposeta, chià buela,

che la ghe ga vendù anca di'a bira

disendoghe che dopo po' 'l ghe tira..!

E sì che chel sentiero jera on spasso,

in piena onbra, dolze, gnanche on sasso;

e sì che la natura, so chel posto,

la te disea de tuto, no del rosto;

e sì che, nonostante tuto, elo

el xe - se sa - chià sorte de vedelo:

ma gnente, proprio no ghe xe sta verso,

che senza on bon panin 'l se sente perso!

 Fortuna ga volesto, ciacolando

e anca in zerti punti pantezando,

che'l grupo xe rivà - che dio la inzenda -

al luogo destinà par la marenda.

CATA’ el sentiero justo, passà in mezo ai famusi du pilastri che tuti ghe ne parlava, tuto el resto xe sta na goduria. La salita, na volta tanto, la jera acetabile e, comunque, jutà dal'onbra fita del bosco de fajo. Tuto parea fato aposta par farse perdonare dele incazadure ciapà parché no se riussia a catare la strada. Bona jente, sti toscani, ma a scoltare ili te te perdarissi anca a casa toa: no ghe n'è uno che dala piaza del paese riessa a farte 'ndare in cesa senza farte sbaliare! A ogni modo el belo magna el bruto, diria Oscar, e godendose se fa presto a dementegare el resto. Durante

na sosta tènica domandà da Tomaso che'l ghea da canbiare el bidon dela bira, Tiziano sparisse ciapando on sentiereto che va su a sini-stra. Ciamarlo e ronpare chel silenzio da paradiso jera come biastemare in cesa. Po' el toso senza dissiplina el xe tor-nà indrio da elo solo disendo de vere visto on lupo. Na ocià de Renzo lo ga messo al so posto. Intanto la strada jera canbià, deventando, dal sentiero dela fotografia, on trodoleto largo na roa, belo assè. Poco manco de on chilometro cussì e xe conparìo el spiazo col rifujo de Capo Vetra. Rifujo par modo de dire, parché el jera sprangà. E tendù da du forestali drio justare calcossa.

I DU forestali ghea pena tajà on pin malà, na bestia pì longa de trenta metri che, cascando, la gha desfà na rete de recinzion; che ili jera drio justare. Sentiendone noantri ca parlavino de magnare, i ga credesto ben che fusse ora anca par ili e, cussì, i xe 'nda via: "Senza saludare!", se ga maravejà Renzo. Luigino xe sta on fulmine a reclamare el so panin e, drio a elo, ogni uno ga vu la so parte. Ghe xe da dire che el pan toscan fa schifo. El xe dessavio, che i ga da vérghio sconto el sale