Chi che tribola el fa senpre pecà

anca se, dopo che'l te ga inmagonà,

te scopri che forse la so malatia

la xe la pì stupida che ghe sia.

Desfato da na fadiga de tri dì

e co na fame che no finisse pì;

ridoto ormai come on fantasma

che rantega come se'l ghesse l'asma;

ciapà dal dovere de stare al passo

credendo, poarin, de essare on asso;

parlando par sete inpè de tasere

riussiendo, cussì, a ronpare 'e pere;

stratolto de cao de ogni salita

e no soportando 'nantra sconfita:

co tuto sto gran peso da portare

da quando che'l parte fin a rivare,

Tiziano, poareto, a ogni sosta

pena rivà cogna che'l se posta

e, catà na posizion sora on sasso

el taca pisocare come on tasso,

fando cofà se staltri no ghe fusse.

El dormiria parfin dessora a'e russe.

"El toso, dise Renzo, 'l pare in doe

ma assè che'l dorma, le xe robe soe".

ANCA se Luigino e Tomaso no ghe credea e Claudio pensava de essare dale parte de Cornoleda, da lì xe sta on sùpio rivare ai Pozzaroni e ciapare el sterato, senpre belo, che passa par el Podere Cipriana, za visto. El programa portava ala visita dela cesa dell'Ermeta e par lì bisognava 'ndare. Anca l'ultimo sentiero segnà sola carta che dovea portare all'Ermeta pa'l bosco no'l ghe jera. Cussì el drapelo ga dovesto ciapare la strada uficiale: on chilometro da contare. Luigino, bituà a vardare le carte, ga fato sùito du cunti: se ghe xe on chilometro e se va su de 250 metri, vol dire che ghe xe el 25% de pendenza, che moltiplicà par sassi, polvare e buse, fà depì. Auguri. Cidenti! Na supa indijesta cussì jera on toco che i sete no la magnava. I calcoli del rajoniere jera justi e xe sta on miracolo se nissuni xe rivà ala ceseta biastemando, che no sarìa sta ijenico! Però l'Ermeta s'a fato pardonare. El posto ga squasi otozento ani, sconto so on bosco e pien de mistero. La pace jera tanta la dessora, che tuti xe sta in silenzio, sentà so le piere soto al portego, amirà dala sen-plicità. De Tiziano e dela so mancanza de rispeto par el luogo santo xe za sta dito. La fotografia dessora dise el resto.

ZO, prunti par dare informazion preziose, ghe jera na bela copieta de vecioti che in du i gavarà vu si e no quatro denti. Ela a ogni parola la se dasea on pugno sol naso co la sbessola. Ma simpatici e cordiali. Sì, i saea che pa' 'ndare ai Pozzaroni ghe jera na vecia strada, la scalinata i la ciamava, ma jera mejo 'ndare pì vanti a domandare. A ogni modo, via par lì no se sbaliava. Pì vanti xe sta Tiziano a cavare el ragno dal buso: bituà a vardare par on finestrin, na volta rivà tacà a na casa in restauro, el ga messo drento el naso pa' on  balcon e el ga tacà a farghe mile compliminti a na sposa co di bei caviji biundi e lunghi. "Signora, el dise, la ga assà i fanalini dela machina forastra-da..."; "Come forastrada i fanalini?" risponde preocupà la sposa co na ose da omo e la barba longa come Noè; “No i fanalini, la machina xe forastrada, signora...", insiste Tiziano incasinando oncora depì el discorso e incerto se ciamare oncora signora el scavejaron barbon; "Come forastrada la machina? Ma se la xe in corte!" ghe dise Noè. "Signore e signori", conclude Tiziano par no sbaliare "La machina forastrada in corte ga i fanalini inpizà!". La sposa, quela vera, na ciociotela sinpatica sbucà dal balcon co na cazuola in man, la capisse el problema e la manda el cagneto a stuare i fanalini. "Grazie", tira le some el cagneto sonando anca el pipì. Co 'nantre do parole incrosà in senese del luogo, Tiziano se assa spiegare la strada, cussì la viacruci del grupeto pole continuare.

CAPIO sùito parché i vecioti ciamava "scalette" la strada. Co na pendenza da scalon da fighi, la se presentava anca col fondo de piere, uso strada romana. E la parea no finire pì, almanco fin che - dopo vere domà a uno a uno i sete cavai - la s'à butà sol bosco assando on fià respirare le bestie. Giuliano e Claudio ga fato da "apripista"; anca Tomaso, batistrada senpre saldo al cao de drio co Renzo ale coste, ala fine xe rivà. L'ultimo toco dele scalete jera acetabile: tera batù e foje, in mezo a on bel bosco fito. Rivà a incrosare la sfalto el sospeto del cartografo xe sta veri- ficà: le scalette altro no la jera che la falsa strada sfalto dela carta, sta sassina (la carta, no la strada, inocente ela).