Magnà col tronbon e perso el quajo,

la trupa decide de darghe l'ajo

al Poggio Trauzzolo, na montagnola

che la carta prometea na fola.

Sola via in zerca del'ataco

Tomaso bisogna che'l mola el maco

e alora se decide de zercare

on posto, on bar atrezà ...par fare.

" E mi voio bevare on bon cafè ",

el fifota Claudio sbatendo i piè.

Purtropo la sielta no jera tanta

e, anca, Tomaso 'l ghe n'ea za spanta,

cussita xe sta che ala prima ocasion

i s'à polajà so on luogo, diobon...

el jera on circolo, e culturale,

ma destinà a quili che le bale

i se le pesta, siorsì, caminando

e co' i te vede i te parla scorlando

le man e la testa, senza contare

che calche volta i prova sbavare.

Ghe jera el cafè, el cesso e le carte,

ghe jera anca on ...socio in desparte

che col ga visto entrare Tomaso

el ga brontolà, supiandose el naso:

" questo xe uno de quili, conpare,

che'l vien chi drento pa' 'ndare a cagare

e no'l xe scrito al circolo anziani.

Però el dimostra tuti i so ani ".

CONSUMA’ el cafè al centro anziani fin che Tomaso sfogava le so frustrazion co la caenela del water, la spedizion s'à rimesso in moto, parché bisognava guadagnare el tenpo perso. Jera na jornata da manuale e bisognava sfrutarla. El posto se ciamava Marroneto e el jera el punto de partenza pa' 'ndare su e girarghe torno al monteselo che ghe fasea onbra. Claudio el se ofre volontario de domandare informazion,  ma sicome

che'l xe inesperto el finisse par farse insegnare la stradadel monte da on carbuniero, che'l jera drio vangare l'orto di'a caserma. "Mi no sò, so forestiero...", pare che'l gabia risposto. Cussì el convolio ga dovesto partire, oncora na volta, 'ndando a palpeto. Sentiero catà, e belo anca. Su par lì ghe jera onbra, salita galantomana e silenzio. Ma la sicureza, da ste parte, la dura poco. Difati, a on trivio che gnanca el segnaleto bianco-rosso te jutava a decidare, la procession s'à imgrumà. Na rapida riunion dela giunta ga partorio l'idea. Se va a destra. Tuto ben, par trexento metri: po'...

...la situazion precipita e ai sete se para davanti na specie de culo de fosso, pendenza da sbochi, fondo incasinà, fadiga da orbi. Pì vanti oncora, quando che'l sentiero se buta so on bosco de fajo, el diventa na bueleta streta, co mile piere che no fa passare le roe. Fin che sparisse tuto e alora ocore fare la gincana fra raise, sassi, faji senza scrupoli e rame scavezà. 'Nantro bel desmonta-baic del'ostrega. Sole retrovie el popolino mormora, come se la colpa de tuto fusse del cartografo uficiale. A so difesa, però, so ogni albaro ghe xe el maledeto segnaleto bianco e rosso. De colpo, na verta avisa el batistrada Ti-ziano che la soferenza jera finìa. Infati el bosco fito ghe ga assà el posto a na bela carezà "a breccia" come ch'i ciama qua i sterati jarà. Alora tuti contenti parché a jera con-

parsa la tracia dela strada maestra. "Contenti on càparo", se sente sberegare dala coa dela procession, ferma in atesa de in     grumarse sola strada. El rajoniere dela congregazion, co la coega rossa dal narvoso, el taca cussì a presentare na mozion de sfiducia ala guida umana. "Te ghe sbalià tuto e se ghemo inpenio le scarpe de foje seche", el ghe dise. Po', senpre pì ingaluzio, el tira fora na parola che el Mestro xe oncora drio zercarla sola cicronpedia. E tuto par cossa? Par on par de chilometri de bosco fato, sì, co la bici in spala, ma in mezo a na natura che ala facoltà de rajoneria i si'a insogna! A ogni modo, co na sventolada in dissesa xe passà tuti i bojuri e, ciapà la sfalto, xe finie tute le gnole...