Ogni volta che se dise "oselo"

tuti quanti i pensa solo a ...quelo

e no i prova, jente senza testa,

a zercare na spiegazion foresta.

On bel dì, e la xe na storia vera,

d'i cicristi, forte e in bela ziera,

i riva so 'n paese di'a Toscana

soto on sole che jera na bubana.

Dopo ver fato on giro par le cale

e visità piazete, cese e scale,

al grupo ghe vien fame e alora

el zerca on posto e lì el fa fora

tute le vetovalie de riserva:

ve juro ch'i ghe n'ea na caterva!

Che sia sta la dijestion, o la bira,

che sia colpa de l'età - za no'l tira! -

fatostà che on vecioto del mucio

al momento de abandonare el cucio

el va via assando in tera el quajo;

sùito pronto, on so colega sgajo

par jutare l'amigo smemorato

el s'incucia e, fasendo on gran bel'ato,

el se carga el zaino sole spale;

senza dirlo, però, sto ronpibale!

On pecato veniale de memoria

el deventa, a volte, par la storia

na specie de condana, on marchio infame

che'l merita na scuria de curame.

Inveze, la se ciama taresina:

on disturbo che, senza medesina,

no'l se cura. E, se te vien on'ataco,

te viaji co la testa drento al saco,

te te desménteghi parfin 'l to nome,

te fè di'e robe stranbe, proprio come

l'amigo dela storia. Ben, e 'l quajo?

Xe sta fati d'i studi dopo 'l guaio

e i ga scoperto che no'l xe on oselo.

Provè a domandarghio a Garavelo!

LA xe sta proprio na bela idea passare par Santa Fiora. A parte la bela jornata. El xe on paeseto co na periferia che no merita gnente, ma co on centro storico da farghe tanto de capelo. Se ghe riva, al centro storico, passando on ponte so na gola fonda e traversando na porta tipo castelo medievale. Na piazza grande, sarà da na serie de palazuni straveci, ma pieni de storia de sicuro e tegnù dadìo. On gireto drento ale viete strete del borgo vecio ga fato respirare storia ai nostri viandanti del pedale. Pecà che no'l fusse pì grande. Zerti angoliti i pare studià aposta par inpenirte de maraveja, e no ghe xe fotografo che no voja portarsene casa on ritrato. Bisogna proprio dirlo: na volta i ghe saéa fare e varda cossa ch'i tirava fora senza cimento o fero opure vetrine. Come za dito, el paese jera picolo e visitarlo se ga fato presto. Ciao, Santa Fiora! Persa la maraveja, Luigino ghe vien in mente la fugazeta col parsuto cronpà da Claudio la matina e no ghe xe sta verso de farghe rimandare el pasto. Tiziano, co la memoria de la so età, se ricordava de ver visto on parco rivando: alora se va a magnare al parco. Soto on'onbra, na panchina spetava i

arditi afamà che i ga magnà conpagnà da na sonada in fa majore de on tronbon in alenamento che ga messo in difficoltà la dijestion del Mestro. La partenza xe sta segnà dala storia del quajo! Bruta assè.