I casi dela vita, no se sa mai,

i pol'essare spassi opure guai

e come ch'i vien bisogna ciaparli;

no solo, ma va ben che te ne parli.

Alora ne parlemo. Primo ato.

Pena tacà 'l giro, sucede on fato

che ga par testimonio 'l bon Tomaso.

Provè a imaginare on poco 'l caso:

el vede, du tri metri pì davanti,

uno d'i nostri sete spedalanti

che, 'ndando vispo suso pa'l sentiero,

a on bel momento 'l casca dal destriero.

Tomaso no 'l volea gnanca dirlo,

ma staltro, da par tera, fato on pirlo

el core vanti senza gnan voltarse

e cossa falo? El va confessarse.

Questo jera Tiziano, el novizo.

Dopo ghe xe tocà al vecio stizo,

l'amigo dipromà da rajoniere,

che a mominti el ghe assa 'e pere

davanti a Tomaso, testimonio

anca de sto secondo pandemonio.

Pì vanti oncora, giro verso 'a fine,

par poco no ghe assa 'e tanpeline

el stantemèn del grupo, 'l sior Narenti.

Giuliano lo ga visto; steme 'tenti:

la tera ben batù e sassi in vista,

gnente raise o altro sola pista;

a on zerto punto l'omo xola via

senza tocare gnanca na pivia...

"Cossa xe sta?" Chi xe che se lo spiega,

par zerto 'l ga ciapà na bela tega!

L'è sta on'erore umano, xe sicuro,

anca se 'l toso 'l tien oncora duro

disendo che xe colpa del sentiero.

E chi che dise no, l'è on culatiero.

A ben vardare el comercialista generale del'organizazion no ghea tuti i torti. Par seguire el programa bisognava, dopo el rifujo forestale, ciapare 'nantro sentiero che - senza la guida par le man - so se saea come che'l fusse. Luigino el xe on omo pien de corajo, ma in conpenso el ga anca del bon senso. La spedizion ghea oncora parecia strada davanti, e jera mejo farne on toco za conossio: ghe jera el ris-cio de inbarcarse so 'nantro "smontabaic". Donca, deciso de tajare, se taja. Quatro chilometri de sfalto - paraltro so on anbiente da fola e senza trafico (varda la fotografia) ga desgranà on fià el grupo, co Tomaso in coa, obligà a farghe conpagnia a Claudio e ala riceta del so dotore. Co anca on fià de dissesa, i omani xe rivà al piazale del rifujo Amiatino, dove che ghe jera la deviazion verso el sentiero-no sentiero. Ma ormai la strada se saéa e, po', davanti ghe jera l'omo-de-neandertalmen-che-tuto-vede, Tiziano, za mandà par lì in avanscoperta el dì prima. Rifare chel parcorso senza doverse fermare par no pèrdarse la xe sta tuta 'nantraroba. El sotobosco jera on lévaro de foje seche e de ramete de fajo, anca quele seche, e tuto saltava, scriciolava, sfritegava, screpitava soto le roe che le se fondava sol mòrbio. On spasso.

Pì vanti oncora, ormai squasi rivà so la sfalto, la trajedia, contà chì in parte anca in rima, ma da contare oncora. Jera scuro, xe vero, sol bosco, ma el sentiero se vedea benon. La dissesa jera veloce, ma no a rota de colo. El grupo jera ben sgranà, e nissuni intrigava. Giuliano, che de solito fa cascare quili davanti, el jera de drio. No ghe jera jazo, no ghe jera paltan, no ghe jera sassi scunti. Passa Tiziano, passa el Mestro, e Luigino, e Claudio e Renzo. No, Renzo no passa, anzi! "Co na manovra da saltinbanco - qua xe Giuliano che conta el fato - el s'à pontà sola roa davanti, alzandose de culo el s'à sbilancià sola sinistra e, tegnendo streto el manubrio, el s'à schiantà par tera seguìo inmediatamente dal zaino e dala bicicreta: elo, soto". Dolore! El ga tentà de spiegarse, de tirare in balo na raisa che no ghe jera, on sasso che no c'entrava, el scuro e altro, ma na bota ciapà sole coste no lo assava parlare. Mejo cussì: conoscendo el tipo, vista la figuraza fata e col bruto caratere che'l ga el avaria finio par dire solo dele stronzade! E no poche... Senza storia la dissesa sfaltà fin a Abbadia dove che i sete ghea apuntamento co uno del luogo. Catà e spiegà el percorso pa'l dì dopo. Renzo no xe sta 'tento: a elo ghe dolea le costignole!