El spirito de grupo xe inportante

parché insieme a se va distante;

e serve assè che in conpagnia se juta,

fusse solo par fare 'a pastassuta.

Difati, rivà fora dal'intrigo

del bosco, so 'n posto ca no te digo,

on spiazo in pieno sole, co par tera

di'a sabia che chissà cossa chi'a jera, 

a se presenta l'ocasion di'a vita

par provare la roba pena dita.

" Scolta, Tomaso, là ghe xe di'a zente;

te ciapi sù, po' te ghe vè arente,

 e te ghe disi senza altro indujo

se ili sa la strada pa'l rifujo ".

" Siorsì - dise Tomaso - desso vago;

in do e do quatro, senza darghe spago,

a torno indrio e co l'informazion

semo al rifujo in manco d'on supion.

Staltri, sicuri che l'omo navegà

int'on menuto el s'avaria informà,

i se gode al sole del'Amiata

disendo de chi'a sorte de jornata.

Dopo 'n ora, la mente de Giuliano,

( fin che Luigino scoltava 'n reoprano )

la mete i soci sùito al corente

che Tomasin no ga pì dito gnente.

On grupo volontario va zercarlo

e ghe riesse proprio de catarlo

che'l torna indrio, dopo vere fato.

" Cossa gai dito, ghe xe morto el gato?"

" I dise che in montagna se va suso

fin che la strada la te mostra el muso

e se te sbagli a te torni indrio:

co questo el me servizio xe finio!".

EL posto pena assà, dove che na marenda co tuto quelo che la razion Kapa la ofria jera sta come la mana, el se ciamava Madonna del Camicione, par via de on capiteleto co drento na madoneta vestia co on camisotobianco e celeste. Belo, ma desmentegà sùito par maravejarse davanti al bosco che se presentava. A parte el sentiereto, de quili da sbalo tènico, pien de risorse, ghe jera on bosco de fajo da restare senza fià. Cussì, par almanco vinti minuti, la menoaja no s'à reso conto de verse perso 'nantra volta. Xe sucesso so on slargo dove che el so sentiero se incontrava co nantri tri, quatro che i rivava da tute le parte. E i parea tuti segnà: sentiero 10! " Che belo che xe qua ", ga dito Tomaso contento come na pasqua. " Ma no saemo pì dove ca semo ", ghe risponde la guida umana che, ale prese co la cartina malefica al vintizinquemila, no ghe riussìa pì de catarghe l'angolo. El soleno jutava, parché no'l passava fra i faji. El naso gnanca, parché tradìo dal bonbardiere comercialista intronbonà. E alora? El Mestro se ricorda de vere la bussola so la cassela d'i atrezi! Cavà el strumento, che po' el te dise solo dove che xe el nord  no dove che se va pa 'ndare a Ruigo, questo buta l'ago dala parte justa: cioè dala parte oposta de dove che volea 'ndare Luigino. Che po' la se presentava come na dissesa spetacolare. Calche dubio? Sì, tanti! Ben, alora zo par qua: el Mestro se buta e staltri inveze anca. Che dissesa! E che silenzio, roto solo dai zighi del convolio che fasea la gincana fra sassi, raise, muci de foje, e tuto quelo che se presentava ai sete. Purtropo la 'ndasea tanto in zo, che vol dire tanto in

su par dopo! Infati: finia la sagra in dissesa, i mussi ga dovesto pentareala morte par portarse fora dal bosco, in direzion - ormai quela justa - del rifujo forestale che li spetava. Ma li spetava anca on paro de sorprese: on aiuto sfrutà male e parfin on amutinamento.

Le informazion cussì precise de Tomaso ga passà la bala dela decision al comitato esecutivo. Ghe xe on bivio? se va a sinistra! E zo par na dissesa de sassi, che la direzion dovea essare quela (tanto, ghea dito l'informatore de Tomaso, a 350 me- tri ghe xe la sfalto). Dopo on chi- lometro, gnente sfalto. Alora se tor- na indrio, decide la giunta. Se ga so levà, senza retegno, on saco de pro- teste; fadiga cancara par risalire la salita che prima la jera dissesa. Rivà da nuovo al bivio, se ciapa a destra par dove che se riva ala sfalto. L'intuito del navigatore stabilisse che quela justa jera staltra, infati qua el grupo se cata, adesso, massa in zo, rispeto al rifujo. Risultato? Luigino xe stufode vanti e indrio: el vuole spedalare sol serio. Alora se va par las falto. Nissuni ga el corajo de oporse (saria massa pericoloso, parché l'omo el xe oncora pì intasà).